Berrikuntza teknologikoak

Agur roaming, agur! Ibiltaritza bukatzen da. Zertan ukituko zaitu?

roamingaren bukaera

Aste honetan bertan, ekainaren 15ean, roaminga bukatuko da. Europar Batasuneko telefono mugikorretako erabiltzaileok gure eremu geografikotik kanpo erabiltzeko aukera izateko ez dugu aparteko zerbitzua kontratatu behar izango. Telefonoz deitu, nabigatu edo mezuak bidaltzeak EBko edozein herritan kostu berdina izango du. Zertan ukituko zaitu aldaketa honek? Gakoak azaltzen ditugu hemen, baina edozein kasutan, Agur roaming, agur!

roamingaren bukaera

Orain arte, gure telefono mugikorra erregistratua dagoen eremu geografikotik kanpo erabiltzeko aukera ematen zuen zerbitzua aparte ordaindu behar genuen. Eremutik kanpo jasotako edo eremutik kanpora egindako deiak ohikoak baino garestiagoak izan dira. Ibiltaritzako errekargua edo roaming bezala ezagutu dugu neurri hau, baina aste honetan bertan behera geratuko da. Ostegun honetatik aurrera, deitzea,  internet telefono mugikorraren bidez erabiltzea edo mezuak bidaltzea prezio berdina izango dute, Bilbon eta Helsinkin; berdin dio non egongo garen.

Zein eragin izango du kontsumitzaileongan? Zertan ukituko gaitu neurri berri honek? Hemen gakoak.

Ibiltaritzako errekargua edo roamingaren bukaera ulertzeko gakoak

1. Zer esan nahi du roaminga bukatzen dela?

Ibiltaritzako errekargua bukatzen da eta, beraz, telefono operadoreek europar hiritarrei Europako beste herrialde batetatik deitu, interneten nabigatu edo mezuak bidaltzeagatik eta harrerako herri horretako sare batetara konektatzeagatik esleitzen ziguten aparteko zerbitzu hori eta horren kostua bukatuko da.

2. Zein erabiltzaileei eragiten die neurri honek?

Etxean bezalako ibiltaritza deituko diote hemendik aurrera. Zerbitzu aldaketa honekin, lanagatik edo oporretan euren etxetik eta Europar Batasunaren barruan bidaiatzen dutenentzako sortu da. “Etxetik” terminoarekin, bizi diren herria edo hiritarrak nolabaiteko lotura duen herria ulertzen da. Beraz, talde honetan sartuko dira baita ere euren herrialdetatik kanpo ikastera doazenak, beste herrialde batean lan egiten dutenak edo erretiroa hartuta beste herrialde batetara bizitzen joan direnak.

Telefono konpainiek kontsumitzaileei egoera horren frogak eskatzeko ahalmena izango dute, etxean bezalako ibiltaritza kontratuaren baldintzetan sartu aurretik.

3. Zein herrialdetan emango da roamingaren bukaera?

Europar Batasuneko 28 herritan: Alemania, Austria, Belgika, Bulgaria, Zipre, Txekiar Errepublika, Kroazia, Danimarka, Eslovakia, Eslovenia, Espainia, Estonia, Finlandia, Frantzia, Grezia, Hungaria, Irlanda, Italia, Letonia, Lituania, Luxenburgo, Malta, Herbehereak, Polonia, Portugal, Erresuma Batua, Errumania eta Suedia.

4. Erresuma Batuan aplikatuko da?

Bai, Erresuma Batuak ekainaren 15ean ibiltaritza bertan behera utziko du beste Europar Batasuneko herrialdeekin batera. Erresuma Batuan lan egiten duten telekomunikazio konpainiak, Vodafone eta Three adibidez, dagoeneko bezeroei zerbitzu honegatik kobratzeari utzi diote.

5. Konpainiek zer egin behar dute arau berriari egokitzeko?

Herrialde horietan bizi garen hiritarroi defektuz etxean bezalako ibiltaritza zerbitzua kontratuetan eskaini beharko dizkigute.

6. Bezerook ez dugu ezer ordaindu behar izango, baina konpainiek?

Konpainiek euren artean ordainketak bideratu beharko dituzte, bezerook EBeko beste herrialdetan erabiliko ditugun zerbitzuengatik. Hau guztia kudeatzeko gehienezko ordainketa prezioa finkatu da: 0,032 euro minutuero deietarako; 0,01 euro SMSen kasuan; eta 7,7 euro datu gigabyte bakoitzeko (honek 2018ko urtarrilaren 1etik aurrera 6 euroko kostua izango du eta urtez urte prezioa jaisten joango da: 4,5 euro 2019an, 3,5 euro 2020rako, 3 euro 2021 eta 2,5 euro 2022an).

Prezio hauek ezartzearen erabakia, ibiltaritzako zerbitzua errekargurik gabe eskaini ahal izateko hartu da, aldi berean barne prezioak ez garestitzeko eta harrerako herrialdeek kostuak berreskuratzeko aukera izateko, bertoko hiritarrengan eraginik ez sortzeko.

roamingaren bukaera

7. Etxean bezalako ibiltaritza zerbitzua behin betiko ibiltaritza gisa ezarri daiteke?
Ibiltaritzako bertan behera uztearen erabakia epe laburretan erabiltzaileon mugikortasuna erraztea emateko hartu da. Horregatik printzipioz lan bidaia edo oporretarako aurreikusita dago, baina ez behin betiko beste herrialde batetako konpainia etengabe erabiltzeko; hau behin betiko roaminga izango litzateke.
Horregatik lau hileko epea jarri da muga bezala. Telefono-operadoreek epe hauen kontrola eta kudeaketa egin beharko dute.
8. Eta ustezko gehiegizko erabilera egin dela sumatzen badute, zelan kudeatuko da?
Azken lau hilabetetan bezero batek telefono mugikorra atzerrian bere jatorrizko herrialdean baino gehiago erabili duela sumatzen badu konpainiak, erantzukizuna eskatzeko baliabideak martxan jartzeko aukera izango du: bezeroak herrialdean bizi dela frogatu beharko du edo behintzat herrialde horrekin lotura egonkorraren bat daukala. Bezeroak 14 eguneko epea izango du hau egiaztatzeko. Frogatu ezingo balu, operadoreak erreklamazio prozesua hasteko eskubidea izango du eta bezaroari Europar Batasunak ezarritako gutxienezko ordainketa berak bere gain hartzea eskatu ahal izango dio. Bezeroa honekin ados ez balego, aginte arautzailera jo dezake eta honek bien arteko eztabaidan bitartekaritza lana egingo du.
9. Zer gertatzen da muga-langileriarekin edo Europar Batasuneko mugak sarritan zeharkatzen dituztenekin?
Bezero hauek baldintza bereziak izango dituzte: eguneko edozein unetan sare nazionalera konektatzen badira, konexio hau egun bat bezala zenbatuko da.
10. Datu mugikorretako kontsumorako mugak egongo dira?
Bai, mugarik gabeko datuak edo prezio txikietan datu bolumen handiak eskaintzen dieten kontratuak lotuta dituzten bezeroek mugak izango dituzte eta 7,7 euro/gigabyte bakoitzeko gehienezko prezio horren azpitik ordainduko dute.

Atzerrira bidaiatzen dugunean gure kontratuen baldintzetan ezarrita dauden dei kopurua eta testu mezuak erabilgarri izango ditugu. Baina datuei dagokionez, gure hileko kontratuan jasota daukagun datu bolumenaren bikoitza erabili ahal izango dugu, ibiltaritzako datuetarako ezarritako gehienezko prezioan (7,7 euro/GB). Muga hau gainditzekotan, operadoreak errekargua kobratzeko eskubidea izango du, betiere ezarritako gehienezko prezioa gehi zergak gainditu gabe.

 roamingaren bukaera
Aro berri bati bukaera ematen dio neurri honek eta beste epe bat hastera doa. Datuekin mugak izango baditugu ere eta beste herrialde batetako operadorearekin kontratua lotzeko aukerarik izango ez dugun arren, aldaketarekin bezerook irabaziko dugu eta Europar Batasuna barruan eraginik gabe erabili ahal izango dugu mugikorra.
Beraz, Agur roaming, agur!

Save

Iruzkinak


Gure artikuluak zuzenean zure postontzian jaso nahi dituzu?

Nola jaso nahi dituzu artikuluak postontzian?

Iruzkina idatzi nahi baduzu